ഇന്ത്യൻ വ്യാപാരിയുടെ മാതൃകാപരമായ സത്യസന്ധതയെ പ്രശംസിച്ച് വിദേശ വനിത പങ്കുവെച്ച വീഡിയോ സോഷ്യൽ മീഡിയയിൽ തരംഗമാകുന്നു. ദീർഘകാലമായി ഇന്ത്യയിൽ താമസിക്കുന്ന ഡോമിനിക പട്ടാലാസ് കർള എന്ന പോളിഷ് യുവതിയാണ് ഇൻസ്റ്റാഗ്രാമിലൂടെ തന്റെ അനുഭവം പങ്കുവെച്ചത്.
നാല് ദിവസം മുൻപ് ഡൽഹിയിലെ ഒരു മെഡിക്കൽ ഷോപ്പിൽ നിന്ന് വാങ്ങിയ മരുന്നുകൾ അടങ്ങിയ കവർ ഡോമിനികയും പിതാവും അവിടെത്തന്നെ മറന്നുവെച്ചിരുന്നു. തുടർന്ന് നഗരത്തിന് പുറത്തുപോയ അവർക്ക് ദിവസങ്ങൾക്ക് ശേഷമേ തിരികെ വരാൻ സാധിച്ചുള്ളൂ. കവർ തിരികെ കിട്ടുമെന്ന വലിയ പ്രതീക്ഷയൊന്നുമില്ലാതെയാണ് നാലാം ദിവസം അവർ കടയിലെത്തിയത്.
എന്നാൽ, ഡോമിനിക കടയിലെത്തി കാര്യം പറഞ്ഞയുടൻ തന്നെ കടയുടമ ആ കവർ സുരക്ഷിതമായി എടുത്തു നൽകുകയായിരുന്നു. ഇന്ത്യക്കാരുടെ ഈ നന്മ തന്നെ അത്ഭുതപ്പെടുത്തിയെന്ന് ഡോമിനിക വീഡിയോയിൽ പറയുന്നു.
“ഇത്രയും വലിയ ജനസംഖ്യയുള്ള ഇന്ത്യയെപ്പോലൊരു രാജ്യത്ത് ഇന്നും ഇത്തരം കാര്യങ്ങൾ നടക്കുന്നു എന്നത് എന്നെ ഞെട്ടിക്കുന്നു. അതുകൊണ്ട് തന്നെയാണ് ഞാൻ ഈ രാജ്യത്തെ ഇത്രയധികം സ്നേഹിക്കുന്നത്.” – ഡോമിനിക പറഞ്ഞു.
വീഡിയോ വൈറലായതോടെ സമാനമായ അനുഭവങ്ങൾ പങ്കുവെച്ച് നിരവധി ഇന്ത്യക്കാരാണ് രംഗത്തെത്തുന്നത്. മൊബൈൽ ഫോണും പണവും അടക്കമുള്ള സാധനങ്ങൾ മറന്നുവെച്ചിട്ടും കടക്കാർ അത് സുരക്ഷിതമായി സൂക്ഷിച്ചു ഏൽപ്പിച്ച കഥകൾ പലരും കമന്റുകളിലൂടെ പങ്കുവെക്കുന്നുണ്ട്. ‘ഇത് ഇന്ത്യയിൽ മാത്രം സംഭവിക്കുന്ന കാര്യമാണ്’ എന്നാണ് ഭൂരിഭാഗം പേരുടെയും പ്രതികരണം.
